چشمِ فلک نے دیکھا یہ منظر غدیر میں
چمکا نبیؐ کے دیں کا مقدّر غدیر میں
تھی دھوپ اور ولایتِ حیدرؑ غدیر میں
کتنوں کے دل جلے تو کئی سر غدیر میں
وہ تو کہو کہ ایک ہی حارث وہاں پہ تھا
ورنہ برستے اور بھی پتھر غدیر میں
اُوفِ بِعَهْدِکُمْ تری تکمیل ہوگئی
پہلے خلیفہ ہوگئے حیدرؑ غدیر میں
الله نے کہا ہے تب اکملتُ دینکم
من کنتُ جب ہیں بولے پیمبرؐ غدیر میں
ہیں گھومتے ابھی بھی وہ بستر لئے ہوئے
اِتنا زیادہ آیا تھا چکّر غدیر میں
راز و نیاز کیا شبِ معراج میں ہوا
ظاہر ہوئی یہ بات بھی جاکر غدیر میں
اتممتُ نعمتی نہ کہے کردگار کیوں
پوری ہوئی ہے مرضیٔ داور غدیر میں
اُترا لئے تھے اُن کے کجاوے رسولؐ نے
جو بھاگ جانے والے تھے اکثر غدیر میں
عرفانؔ بوترابؑ تھا منبر پہ اِس لئے
بیٹھے ہوئے تھے سارے زمیں پر غدیر میں
